想不到在一次展覽會上，就學校註冊制度吐了幾句苦水，竟攪到滿城風雨，難為了教統局，和局內的同僚，謹此致歉。一併感謝各部門、包括城規會、消防處、建築處、衛生處和註冊組同僚的良好工作態度，和在註冊過程中提供的詳細解釋、指導和協助。
明人不做暗事，報紙上訪問我 D 細字，大部份係我講既，但噴火既標題，文字工夫咁好，就肯定唔關我事啦！電台有位節目主持講句笑，話係宣傳高招，咁快就抄落黎派街坊，有冇俾版權費人地架？年紀輕輕，唔好學埋D 茅招，去踩人撞人，唔好睇嘛！
敝中心憑靈活、創新的語言教學法同口碑取勝，每日都有好高水準既父母，為子女報我地 D 課程，隔離五星級客棧D 大客，都帶備大張銀票，過黎執英文、學廣府話，我又駛嘜借舊上司個衙門過橋，做傷天害理既事呢？
喂，但係為左個臨時註冊，我地確實係等左好奈好奈，到春去秋來，由龍舟水等到食月餅喎！中間雖冇俾人淋紅油，卻收到好有阻嚇力既信，話在未有批文前，唔準做生意，唔準乜乜乜乜乜，否則要罰二十萬，坐兩年監。又唔係殺人放火，又唔係丟駛人地保險箱既貴重物品，又會罰得咁重既！
我原以為落重本，租甲級寫字樓，用足靚料，請哂註冊則既專業人士負責裝修工程，並親自往各部門拍門遞表，希望可以納少兩個月空租，結果事與願違，自已個中心雖然已經無懈可擊，卻被原可以在其他時間處理的公眾走廊等枝節問題上糾纏了三個多月的時間，才能完成整個註冊程序。唔知其他人申請，由頭到尾，要幾奈時間呢？
食環處的註冊程序，只要有則師、工程師、和消防工程師等專業人士在安全問題上揹飛，就先發臨時牌照，開張先咯！人地手續簡潔明快，前後不需一個月。各有關部門，在酒樓開業後，有充份時間，作抽樣調查，不必延誤開業日期，公私兩便。
勞工處重醒，先知先覺，於 80 年代，以工廠開業通知書，取代己有50 多年歷史的工廠發牌制度。當時工廠數目，由30 年代的數百間，增加至80 年代的十多萬間，行政審批時間，長達270 日，成為工業家的惡夢，貪污的溫床。
當時勞工處既鬼佬處長布立治，了解民困，挺身而出，提出修例，以法治取代行政審批，工廠東主只需在開廠的時候，書面知會勞工處處長，便可開業。幫辦巡廠，如發覺未有做足安全措施，咩出告票咯，唔駛等發牌架。新制度利商便民，深受廠家歡迎，並創造大量就業機會。布處長雖已乘鶴仙去，工業家至今仍受惠於其德政。
藝術學院、畫室、琴行、舞蹈室、合唱團、棋社，唔駛註冊；語言中心、電腦班、和補習社，卻要註冊。兩者的服務對象同樣是學童，為什麼有 D 要保障，有D 唔駛？為什麼冇保障既學童，又同樣咁安全？地政、城市規劃、律政、建築、消防、衛生等部門，已各自有其完善的法例和執行機制，保障市民[ 當然亦包括學童] ，又何必要學習中心多經一次行政審批既程序呢？現行的學校註冊制度，用係正規學校就算啦！
講句公道說話，教統局好人多，奸人少，或者沒有。我退唔退休，都咁支持教改既啦，學校註冊制度，是否亦應該上教改既議程呢？良藥雖然苦口，但真係要聽聽業界既意見，真實世界，同報告、甚至報上睇到既世界，有時會有好大出入架！
[ 東山語言中心 周東山 零四年十月十一日]
下載全文 |
